Обращение
Күндү Горнай уонна Үөһээ Бүлүү улуустарын олохтоохторо, биир дойулаахтарым!
Россия историятын көрдөххө, аахтахха, маннык уматык кризиһэ бастакытын үөскээтэ. Онтон аан дойдуга «нефтяной кризис» диэн ааттаммыт улахан кризис 1973 сыллаахха Израиль араб судаарыстыбаларын кытта байыаннай иирсээннэриттэн саҕаламмыта. Бу АХШ, Европа дойдуларын уонна Япония экономикаларыгар күүскэ охсубута.
Биһиэхэ, сахаларга, куһаҕан да үчүгэйдээх, үчүгэй да куһаҕаннаах диэн өс хоһооно баар. Нефтяной кризис түмүгэр бу дойдулар уматык, энергетика өттүгэр, уопсайынан, экономикаларын тутулугар тосту уларытыылары киллэрбиттэрэ. Бастатан туран, автогигант собуоттар кыра иэннээх, аҕыйах уматыгы сиир массыыналары оҥорон саҕалаабыттара. Дьиэни сылытар аныгы технологиялары олоххо киллэрбиттэрэ. Атомнай энергетика, чох промышленноһа сайдыбыттара, күнтэн, тыалтан уот ылар станциялар тутуллубуттара.
Уматыгы, электроэнергияны оҥорон таһаарыыга саҥа ньымалары тобулуу
Билигин биһиги бары уматык кэмчи буолбутуттан соһуйабыт, кыыһырабыт. Онтон салгыы хайдах буолабытый? Мин санаабар, билиҥҥи сорук – уматыгы, электроэнергияны оҥорон таһаарар атын ньымалары, саҥа технологиялары үөрэтии, баһыйыы, олоххо киллэрии буолар. Бу тула олохтоох дьон, наука, бизнес, былаас – бары бииргэ түмсэн үлэлиэх тустаахпыт.
Тыа хаһаайыстыбатыгар субсидияны улаатыннарыы
Билигин Ил Түмэн уопсайа 70 депутаттааҕыттан - 55-һэ «Биир ньыгыл Россия» партия депутаттара, онтон «Саҥа дьон» - 6, КПРФ - 4, «Сиэрдээх Россия» - 3, ЛДПР - 1 депутаттаахтар уонна 1 самовыдвиженец. Онон аҕыйах ахсааннаах партия дьонун туруорсууларын, төһө даҕаны сөптөөх буолбуттарын иһин, ньыгыллар, баһыйар үгүс ахсааннаах буоланнар, саба баттыы олороллор. Ол аата биир партия эрэ санаабыта, соруммута олоххо киирэр кыахтаах. Кырдьыгы, дьиҥ чахчыны этии, ыллыктаах суоллары, хайысхалары торумнааһын - бу барыта былаас партиятын утары барыы курдук эрэ ылыныллар буолан турар.
Онтон демократия сүрүн ис хоһооно тугуй? Барыта норуот туһугар, киһи быраабын туһугар. Олус судургу буолбатах дуо? Ол эрээри билиҥҥи кэмҥэ демократия ити дьиҥ суолтата умнуллан эрэр.
Күндү дьонум-сэргэм!
Мин сыалым-соругум биир - норуот туһугар үлэлииргэ. Хас биирдии киһи үлэлээх-хамнастаах, хааччыллыылаах дьиэлээх-уоттаах, оҕолорун үөрэттэрэр кыахтаах, сааһыран баран дуоһуйа сынньанар пенсиялаах буоларын туһугар.